جلسة علاجية: مهارة إدارة وتنظيم المشاعر..كيف تحافظ على العلاقات فى الأسرة والعمل؟

 تدريب بطاقة المشاعر اليومية

هذا التدريب مناسب للمعالجين والتدريب الذاتى لمن يعانى (القلق-الاكتئاب-الاندفاعية-سرعة الغضب-اضطراب نقص الانتباه-اضطراب الشخصية الحدية-ثنائى القطب النوع الثانى)

المعالج:
واضح إنك مدرك إن ردود أفعالك الاندفاعية بتأثر عليك بالسلب في البيت والشغل. تحب نجرّب حاجة بسيطة تساعدك تتحكم أكتر في مشاعرك قبل ما تسيطر عليك؟

العميل:
آه يا ريت. أنا نفسي أغيّر بس مش عارف أبدأ منين.

استخدام بطاقة المشاعر اليومية:

المعالج:
تمام. أنا هعلّمك تمرين اسمه بطاقة المشاعر اليومية. الفكرة منه إنك تكتب كل يوم لمدة 5 دقايق بس إيه اللي حصل معاك، شعرت بإيه، وقوة الشعور قد إيه، وتصرفت إزاي. بعد كده تكتب: كان ممكن أتعامل إزاي بشكل أهدى أو أصح.

العميل:
طب يعني أكتب إيه بالظبط؟

المعالج:
خلينا نعمل مثال دلوقتي مع بعض.

• لو افترضنا إنك امبارح كنت في اجتماع وزميل قاطعك، إيه اللي حصل؟

العميل:
هو فعلاً حصل كده. قاطعني وأنا بتكلم. حسيت بإهانة وغضب جامد.

المعالج:
ممتاز، يبقى نكتب:

• الموقف: زميلي قاطعني.

• المشاعر: غضب وإحباط.

• الدرجة من 1 لـ 10: نقول 8.(مثلًا)

• رد الفعل: عليت صوتي وقلتله إنه بيقاطعني دايمًا.

• البديل الصحي: كنت ممكن آخد نفس عميق وأكمل كلامي للآخر، وبعد الاجتماع أكلمه بهدوء وأقوله "أنا محتاج أخلص كلامي من غير مقاطعة".

العميل:
أيوه كده باين إن فيه فرق كبير. بس مش دايمًا بفكر بالهدوء ده وقت الموقف.

المعالج:
وده طبيعي جدًا. علشان كده التمرين ده مهم. كل ما تكتبه يوميًا، هتبدأ تلاحظ أنماط متكررة في مشاعرك وسلوكك. وبعد أسبوع هنراجع مع بعض البطاقات ونشوف: إيه أكتر مشاعر مسيطرة عليك؟ إمتى بتتكرر؟ وإيه ردود الفعل اللي محتاجة تتغير؟

العميل:
حلو. يعني كأني بعمل كشف حساب لنفسي كل يوم.

المعالج:
بالظبط. وكمان هنحط خطة صغيرة للأسبوع اللي بعده. مثلاً: "لما أغضب من مراتي، هحاول أقول: أنا محتاج دقايق أهدى قبل ما نكمل الكلام" بدل ما تتخانق فورًا.

العميل:
حسيت إن دي حاجة ممكن أعملها فعلاً.

المعالج:
ممتاز. خلينا نبدأ بالبطاقات من النهاردة. المرة الجاية هتجيب معاك 7 بطاقات، وهنراجع سوا. الهدف إنك تتعلم تمسك مشاعرك قبل ما هي اللي تمسكك.

تحميل ملف البطاقات: